في حوار خاص لـ«شو بلس» على هامش فعاليات مهرجان الجونة السينمائي، تحدث الفنان كريم قاسم عن سعادته بمشاركة فيلم «القصص» في تجربة سينمائية يرى أنها تستحق تمثيل مصر في جوائز الأوسكار، كما كشف عن اختلاف الشخصيات التي يتعرف عليه الجمهور من خلالها وفقًا للأماكن والأعمال التي يشاهدونها له، وتطرق إلى خططه الفنية خلال الفترة المقبلة.
كريم قاسم: فخور بمشاركتي في فيلم «القصص»
كيف استقبلت خبر ترشيح فيلم «القصص» لتمثيل مصر في جوائز الأوسكار؟
أنا سعيد جدًا وفخور ومبسوط إني شاركت في المشروع ده، وكنت شايف إن فيلم «القصص» يستاهل إنه يكون ترشيحًا مصريًا في جوائز الأوسكار، وسعيد إن العمل وصل للمرحلة دي، لأن دي تجربة مهمة بالنسبة لي ولكل المشاركين فيها.
كريم قاسم: الجمهور بيتعرف علي من شخصيات مختلفة
هل الجمهور بيتعرف عليك أكتر من خلال شخصية معينة قدمتها، ولا الموضوع بيختلف من مكان للتاني؟
أعتقد إن الموضوع بيختلف حسب المكان اللي بروحه، لأن في أماكن بلاقي الناس عارفاني جدًا من أعمال معينة، وفي أماكن تانية بيكونوا عارفيني من شخصيات مختلفة خالص.
مثلًا، لما بروح الفيوم، بلاقي أطفال كتير عارفيني من فيلم «سمكة وسنارة»، وبيتعاملوا معايا على أساس الشخصية اللي شافوها في الفيلم. وفي أماكن تانية، ممكن يكون الجمهور اتفرج على أعمالي من خلال قنوات زي روتانا، فيفتكروني من أعمال مختلفة، وأحيانًا ينادوني باسم الشخصية اللي قدمتها، زي «ديشة» في فيلم «ولاد رزق»، حتى لو مش كل الناس بتكون عارفة باقي أعمالي.
ونفس الموضوع بيحصل في الأقصر وأسوان، لأن كل منطقة بيكون فيها جمهور ارتبط بأعمال وشخصيات معينة قدمتها، وده شيء مبسوط بيه جدًا، لأن معناه إن أعمال مختلفة وصلت لناس مختلفة.
كريم قاسم: «ونصيبي وقسمتك» من الأعمال اللي الجمهور شافها
ما أبرز الأعمال اللي لاحظت إن الجمهور بيتفاعل معاها وبيفتكرك من خلالها؟
في مجموعة أعمال الجمهور شافها واتعلق بيها، ومنها «ونصيبي وقسمتك»، وكمان في أعمال شاركت فيها خلال موسم رمضان، سواء مع غادة عبد الرازق أو كريم عبد العزيز، وغيرها من التجارب اللي كان ليها جمهورها.
علشان كده صعب أقول إن في شخصية واحدة هي اللي الناس كلها بتعرفني بيها، لأن كل عمل بيكون له جمهوره، وكل شخصية بتسيب أثرًا مختلفًا عند الناس، وده شيء مهم بالنسبة لي كممثل.
كريم قاسم يكشف خططه الفنية المقبلة
هل بتستعد لأعمال جديدة خلال الفترة المقبلة؟
لسه الصورة مش واضحة بشكل نهائي بالنسبة لي، لكن إن شاء الله أنا بسعى إني أحرّك فيلم جديد، ونشوف إيه اللي هيحصل مع بداية السنة الجاية. أتمنى تكون الفترة المقبلة فيها خطوات فنية جديدة، والأهم بالنسبة لي إني أختار أعمال أكون مقتنع بيها وأقدم من خلالها شخصيات مختلفة للجمهور.
